Share This Article
பொம்மி
என்ன பெயர் அது
யாரின் பெயர் அது
என எப்போதுமான கேள்வி
ஒன்று
என்னை துரத்திக்கொண்டே இருக்கிறது
இனிமேலும் ஓட முடியாது
ஓடுவதற்கு தூரமும் கிடையாது
ஒரு குழந்தையை நீங்கள்
எப்போது தூக்கிக் கொஞ்சினீர்கள்
எப்போது கண்டித்தீர்கள்
எப்போது குதிரை ஏறி விளையாட்டு காட்டினீர்கள்
எப்போது சிரிக்க வைத்தீர்கள்
உங்கள் உள்ளங்கை குழந்தையின்
சூட்டை எவ்வளவு நேரம் சேமித்தது
எனக்கு இன்றுவரை அது
சேமிப்பிலேயே இருக்கிறது
கூடவும் இல்லை
குறையவும் இல்லை
கொஞ்சமும் மாறாத இளஞ்சூட்டு
கதகதப்பை இன்றுவரை உணர்கிறேன்
எப்போது கூட உணரவே செய்கிறேன்
சில ஆண்டுகளுக்கு முன்பாக
அப்பா ஆவதற்கான
அடையாளத்தை கண்டதும்
கைகால்கள் நிற்கவில்லை
பூமி காலில் படவில்லை
தயாரானோம்
எல்லாவற்றையும் சேகரிக்க
செய்தோம்
ஆடைகள் சேர்த்தோம்
ஆரோக்கிய அறிவுரைகளைத்
தேடிக்கொண்டோம்
மாதங்கள் மறைந்தன
திடீரென இரவில்
நீ வருவதற்கான வெளிச்சம்
ஒரே பரவசம்
ஒரே குதூகலம்
ஆனால் அதற்கு
இன்னும் மாதங்கள் உண்டு
இத்தனை ஆவேச அவசரம் கூடாதே பொம்மி
அப்போதுதான் உன்னை
முதன் முதலில் பார்த்தேன்
உன் வாசம் உணர்ந்தேன்
அம்மாவின் அலறலில்
அவள் அடிக்காலில்
இருந்து நீ
வழிந்து கொண்டிருந்தாய்
அள்ளி எடுத்து அணைக்க
காத்திருந்தவனுக்கு
அள்ளி எடுக்க மட்டுமே முடிந்தது
அணைக்க வாய்க்கவில்லை
என் விரல்களில் இடுக்கிலிருந்தும்
நீ வழிகிறாய்
என்னால் உன்னை நிறுத்த முடியவில்லை
தடுக்க முடியவில்லை
உனக்கோ எதுவுமே தெரியவில்லை
துள்ளிக் குதித்து வழிந்தோடிக் கொண்டிருந்தாய்
உன் கறுஞ்சிவப்பு வண்ணத்தையும்
இளஞ்சூட்டு ஸ்பரிசத்தையும்
இறக்கி வைக்க திராணி இருக்கவில்லை
அப்படியே என் மார்பில் பூசிக்கொண்டேன்
நீ உறங்க வேண்டும் என்பதற்காய்
நான் சத்தமாகக்கூட அழவில்லையடி பொம்மி
அன்று தொடங்கி
என்றைக்குமான
நித்திய குழந்தையாய் நீ
நிரந்தரமான பொம்மியாக
எனக்குள்ளே நுழைந்து விட்டாய்
தயாஜி.
முன்னாள் வானொலி அறிவிப்பாளர். புத்தகச்சிறகுகள் புத்தகக்கடை எனும் இணைய அங்காடி வைத்துள்ளார். இதுவரையில் ‘ஒளிபுகா இடங்களின் ஒலி’ என்ற பத்திகள் தொகுப்பும், ‘அந்தக் கண்கள் விற்பனைக்கல்ல – 101 குறுங்கதைகள்’ தொகுப்பும் , ‘பொம்மி’ கவிதைகள் தொகுப்பும் வெளியிட்டுள்ளார். ‘வெள்ளைரோஜா பதிப்பகம்’ எனும் பதிப்பகத்தையும் தொடங்கியுள்ளார்
